ZAKOVATLI YOSHLAR “HOKIM KUBOGI”NI QO‘LGA KIRITDI

Toshkent shahar hokimligi joriy “Ilm-ma’rifat va raqamli iqtisodiyotni rivojlantirish yili”ning maqsad va vazifalariga muvofiq tarzda maktab o‘quvchilari o‘rtasida “Zakovat” intellektual o‘yini bo‘yicha “Hokim kubogi” turniri o‘tkazilishini e’lon qilgan edi.

Mazkur musobaqa yoshlarning bilim va salohiyatini aniqlash, ularning ilm-fanga bo‘lgan qiziqishini orttirish va shu yo‘nalishdagi izlanishlarini munosib rag‘batlantirish maqsadida tashkil etilib, poytaxtimizning o‘quvchi yoshlari o‘rtasida 2020 yil fevral-mart oylarida ikki bosqichda o‘tkazildi.

Saralash guruhida yuqori o‘rinlarni egallab, final yo‘llanmasini qo‘lga kiritgan 30 ta ta’lim muassasalari jamoalari bugun 11 mart kuni Uchtepa tumanidagi 238-maktab binosida intellektual musobaqaning final bosqichida kuch sinashdilar.

O‘quvchilarning bilim va qobiliyatlari musobaqa hay’at a’zolari tomonidan adolatli va xolisona baholandi. Natijalarga ko‘ra 3-o‘rinni Yashnobod tumanidagi 255-maktab jamoasi, 2-o‘rinni Yashnobod tumanidagi 244-maktab jamoasi, 1-o‘rinni O‘zbekiston Respublikasi Milliy gvardiyasi tasarrufidagi Respublika ixtisoslashtirilgan musiqa Akademik litseyi jamoasi egallab, “Hokim kubogi”ni qo‘lga kiritdi.

Shuningdek, g‘olib jamoalarga “Hokim kubogi” mukofoti jamg‘armasidan quyidagilar topshirildi:

1-o‘rin: maxsus kubok, maktab uchun 10 dona kompyuter jamlanmasi, o‘quvchilar uchun planshet;

2-o‘rin: maktab uchun 200 dona badiiy kitoblar jamlanmasi, o‘quvchilar uchun bukrider;

3-o‘rin: maktab uchun 100 dona badiiy kitoblar jamlanmasi, o‘quvchilar uchun 10 donadan kitoblar.

Ushbu musobaqa o‘quvchilarining dunyoqarashini, mantiqiy fikrlash doirasini kengaytirish, ularni kitobga bo‘lgan muhabbatini oshirish, ta’lim muassasalari o‘rtasida intellektual raqobatni kuchaytirishga xizmat qildi desak mubolag‘a bo‘lmaydi.

website: www.milliygvardiya.uz
channel: @milliygvardiyauz_official
https://telegram.me/joinchat/AAAAAE7wenBERsQn4gH5Iw